LVI. In den derden dage was gemaect ene brulucht in Cana Galilee. ende dar was Jhesus moeder. ende Jhesus was dar ooc geroupen ende sine jongere ter brulucht ende dar gebrac wijns. Doe sprac Jhesus moeder te hem. si en hebben ghenen wijn. Ende Jhesus seide hare. wijf wat es mi enti. mine stonde nes noch niet comen. Doe sprac sijn moeder toten dienaren so wat hi u heet dat doet. Dar stonden ses kruken die dar geset waren na gewoneit der joden zuveringe die hilden somige te tween maten of te drien. Doe sprac Jhesus te hem. vullet die kruken met watre. ende si vulletse tote boven up. Doe seide hem Jhesus scept nu. ende draget den architiclino. endesi drougene hem. mar doe die architiclinus gesmaecte dat water dat wijn ghemaect was ende hine wiste niet wanen dat was. mar die dienaren wistent die water sciepen. Doe riep die architiclinus den brudegome ende sprac te hem. mensche geift ten eersten den goeden wijn. endi alsi dronken sijn so geift hi den crancsten. mar du hebs den besten wijn behouden tote nu. Dit dede Jhesus in den beginne sire tekene in Cana Galilee ende oppenbarde sine glorie. Ende sine jongere geloofden in hem.
II
Des dorden daghes worden brulochten ghemaect in Cana Galilee ende Ihesus moeder was daer. Ihesus ende sine jongheren waren oec ter brulochten ghenoedt. Ende doe daer wijns ghebrac, seyde Ihesus moeder tot hem: Si en hebben ghenen wijn. Ihesus seyde tot hoer: Wijf, wat is des di ende mi? Mijn ure en quam noch niet. Doe seyde sijn moeder den dienres: Soe wat hi u seghet, dat doet! Daer waren zees stenen cruken gheset nader Joden zuveringhe, ende eelc hielt twevoudighe maten of drievoudighe. Ende Ihesus seyde hem: Vollet die cruken mit water. Ende si voldense al totten oversten. Ende Ihesus seyde hem: Sceencket nu ende brenghet den prince des hoves. Ende si brochtent. Doe hi den wijn die vanden water ghemaect was, smaecte ende niet en wiste, wan hi quame, mer die dienres wistent, diet dwater ghescept hadden, doe riep die prince der brulochten den brudegom ende seyde hem: Eelc mensche seet irst den goeden wijn ende als die lude dronken sijn, dan settet hi dat ergher is, mer du hebste den gueden wijn ghehouden al |52r| noch toe.
Dit beghinne der teykene dede Ihesus in Cana Galilee ende apenbaerde sine glorie, ende sine jongheren gheloefden in hem.
II
Ende dies derds daghes sijn brulochte ghemaect in Chana Galilee, ende daer was Ihesus moeder, maer Ihesus es gheroepen ende sine jongheren ter brulocht. Ende den wijn ghebrekende seide Ihesus moeder te hem: Sine hebben ghenen wijn. Ende Ihesus seide hare: Wat mi ende di, wijf? Mine ure en quam noch niet. Sijn moeder seide den dienaren: Soe |194v| wat hi u seghet, doet. Daer waren gheset VI steinen cruken na de suveringhe der Joden, elke begripende twevuldeghe mate ochte drievuldeghe. Ihesus seide hen: Vult de cruken met watre. Ende si vuldense toten oversten. Ende Ihesus seide hen: Scept mi ende draghet den archytriclino. Si droeghen. Maer doe archytriclinus ghesmaecte dwater wijn ghemaect, ende niet en wiste wa\nent was, maer die diennaren, die dwater sciepen, wistent, archytriclinus roept den brudegoem ende seide hem: Elc mensche set ten iersten goeden wijn ende alse si dronken worden sijn, dan dat daer argher es, maer du heves ghehouden den goeden wijn tote noch.
Dat beghen der tekene dede Ihesus in Chana Galilee ende openbaerde sine glorie, ende sine jongheren gheloefden in hem.
